Беларуская лідарка прыняла ўдзел у цырымоніі ўручэння Нобелеўскай прэміі міру, якая прайшла сёння ў Осла, па запрашэнні Марыі Карыны Мачада — венесуэльскай апазіцыйнай лідаркі і вядомай абаронцы дэмакратыі, якая шмат гадоў змагаецца за свабоду і правы чалавека ў сваёй краіне.
Святлана Ціханоўская:
«Я сёння ў Осла, на цырымоніі Нобелеўскай прэміі, якую атрымлівае Марыя Карына Мачада. Марыя Карына смела і ўпарта змагаецца з тыраніяй у Венесуэле, і як ніхто іншы заслугоўвае гэтай узнагароды.
Яе барацьба важная не толькі для Венесуэлы. Яна нагадвае нам усім: супраціў дыктатуры — гэта агульная, глабальная задача.
Мы ў Беларусі праходзім той самы шлях — праз рэпрэсіі, страх і гвалт. І сёння мы згадваем Алеся Бяляцкага, нашага Нобелеўскага лаўрэата, які застаецца ў зняволенні. Мы працягваем змагацца за яго і за ўсіх беларускіх палітвязняў.
Сёння мы адзначаем усіх, хто не здаецца, хто працягвае барацьбу, хто верыць у свабоду, дэмакратыю і мір. Я веру, што праўда пераможа. І Беларусь, і Венесуэла будуць свабодныя».
