Беларуская лідарка сустрэлася з міністрам замежных справаў Польшчы Радаславам Сікорскім падчас працоўнага візіту ў Варшаву. Намеснік Святланы Ціханоўскай у Аб’яднаным Пераходным Кабінеце Павел Латушка таксама ўзяў удзел у размове.
Якія пытанні палітыкі ўздымалі падчас дыялогу?
➖шляхі вызвалення і спосабы падтрымкі беларускіх палітвязняў, у тым ліку – Анджэя Пачобута;
➖падарожныя дакументы, якія цяпер выдаюць на год: прагучала прапанова выдаваць іх на 3-5 гадоў. Міністр пагадзіўся паспрыяць вырашэнню гэтага пытання;
➖патрэба новай праграмы рэлакацыі для беларускага бізнесу;
➖стварэнне міжміністэрскай групы з удзелам МУС, МЗС і Міністэрства Юстыцыі для хуткага вырашэння праблемаў беларускай дыяспары ў Польшчы;
➖падтрымка медыя і грамадзянскай супольнасці;
➖#бязвыбары2025: абмеркавалі стратэгію дэмакратычных сілаў, нелегітымнасць Лукашэнкі і мерапрыемства ў Варшаве;
➖Беларусь як прыярытэт падчас старшынства Польшчы ў ЕС.
Асаблівую ўвагу палітыкі надалі пытанням выдачы візаў і забеспячэння мабільнасці беларусаў. Святлана Ціханоўская адзначыла: актывісты за мяжой сутыкаюцца з цяжкасцямі пры атрыманні візаў, а вялікай колькасці моладзі адмаўляюць у выдачы студэнцкіх візаў.
У сувязі з гэтым лідарка прапанавала спрасціць умовы для атрымання студэнцкіх і працоўных візаў, а таксама разглядзець магчымасць выдачы шэнгенскіх візаў на больш працяглы тэрмін. Акрамя таго, Ціханоўская заклікала выпрацаваць эфектыўны механізм для выдачы візаў у трэціх краінах – напрыклад, у Грузіі.
