Падчас Мюнхенскай канферэнцыі па бяспецы Святлана Ціханоўская правяла сустрэчу з кіраўніком канцылярыі Шольца Вольфгангам Шмідтам. Яны абмеркавалі будучыню бяспекі ў рэгіёне.
На сустрэчы абмяркоўвалі:
– стварэнне кааліцыі ў падтрымку дэмакратычнай Беларусі. Святлана Ціханоўская папрасіла Германію стаць адным з лідараў такой кааліцыі, каб гарантаваць мірны пераход улады, вывад расійскіх войскаў, распрацоўку плана адбудовы Беларусі і плана Маршала для Беларусі;
– неабходнасць паслядоўнага ціску на рэжым з мэтай вызвалення палітвязняў і падтрымкі дэмакратычнага руху;
– неабходнасць жорсткай паслядоўнай еўрапейскай стратэгіі, паслядоўнай санкцыйнай палітыкі (каб санкцыі білі па рэжыме і яго кашальках, але не па беларусах), каб падтрымлівалася мабільнасць, магчымасць людзей перамяшчацца.
Абмяркоўвалі тое, што зараз прапануюць выключыць з санкцыйнага спісу некалькіх блізкіх да Лукашэнкі чыноўнікаў і алігархаў. Ціханоўская абазначыла, што гэта прывядзе да большай беспакаранасці. Зараз Лукашэнка спрабуе праз рэпрэсіі запалохаць беларускае грамадства і праз нейкія міжнародныя кантакты вярнуць сабе ўяўную легітымнасць. Такога не павінна быць – і для гэтага неабходная паслядоўная пазіцыя ўсіх краінаў Еўрапейскага Саюза.
Святлана Ціханоўская падзякавала Германіі, што краіна працягвае выдаваць візы і паслядоўна непрызнае Лукашэнку, але гэтае адзінства павінна быць на ўзроўні ўсіх краінаў ЕС, а камунікацыя паміж демакратычнай Беларуссю і еўрапейскай супольнасцю неабходная.
