15 сакавіка Еўрапейскі Парламент прыняў Рэзалюцыю па Беларусі ў сувязі з рэпрэсіямі супраць беларускага народа. Рэзалюцыю падтрымалі 557 дэпутатаў з усіх краінаў ЕС.
Рэзалюцыя асуджае бесперапынныя рэпрэсіі супраць актывістаў і мірных пратэстоўцаў, павелічэнне колькасці палітычных зняволеных, у тым ліку лаўрэата нобелеўскай прэміі міру і заснавальніка праваабарончага цэнтра «Вясна» Алеся Бяляцкага, закрыццё мінімум 215 медыя, а таксама нядаўні прысуд Святлане Ціханоўскай, Паўлу Латушку, Марыі Мароз, Вользе Кавальковай і Сяргею Дылеўскаму да працяглых тэрмінаў зняволення, працяг тэрміну зняволення Сяргею Ціханоўскаму, а таксама арышт прадстаўніка польскай меншасці і беларускага незалежнага журналіста Анджэя Пачобута. Акрамя таго, у рэзалюцыі звяртаецца ўвага на справу палітычнага зняволенага Мікалая Аўтуховіча, які атрымаў прысуд – 25 гадоў пазбаўлення волі ў калоніі строгага рэжыму.
Еўрапейскі парламент падкрэслівае, што: «Улады Беларусі неаднаразова парушалі правы чалавека грамадзянаў краіны, у тым ліку права на свабоду выказвання меркаванняў, мірных сходаў і асацыяцый, у той час як рэпрэсіі працягваюць закранаць усе пласты грамадства і пераслед асобных асобаў працягваецца пад выглядам барацьбы з экстрэмізмам і тэрарызмам. Нядаўнія папраўкі да Крымінальнага кодэкса Беларусі і прапанаваныя папраўкі да Закона аб палітычных партыях яшчэ больш абмяжоўваюць свабоду аб'яднанняў і могуць фактычна забараніць любую палітычную партыю, якая знаходзіцца ў апазіцыі да рэжыму». Рэжым таксама заблакаваў мандат Камітэта ААН па правах чалавека на атрыманне і разгляд скаргаў на парушэнні правоў чалавека ад грамадзянаў Беларусі.
- Што прапануе рэзалюцыя краінам ЕС?
– Працягваць падтрымку грамадзянскай супольнасці ў Беларусі, уключаючы фінансаванне праваабаронцаў, журналістаў і незалежных СМІ.
– Ціснуць на рэжым Лукашэнкі для вызвалення ўсіх палітычных зняволеных.
– Падтрымліваць ахвяры рэпрэсій і іх сем'і, уключаючы юрыдычную дапамогу і доступ да медыцынскай дапамогі.
– Правесці незалежнае міжнароднае расследаванне парушэнняў правоў чалавека і рэпрэсій у Беларусі.
Прыняцце гэтай рэзалюцыі з'яўляецца значнай перамогай для ўсіх, хто імкнецца наблізіць дэмакратычную будучыню ў Беларусі і нястомна змагаецца за свае правы і свабоды, нягледзячы на рэпрэсіі, якія пастаянна ўзмацняюцца. Для тых, хто зведвае пераслед і турэмнае зняволенне, рэзалюцыя служыць магутным сімвалам салідарнасці і падтрымкі з боку міжнароднай супольнасці.
Рэзалюцыя таксама пасылае моцны сігнал рэжыму Лукашэнкі, што ягоныя дзеянні не застануцца незаўважанымі, і вінаватыя ў рэпрэсіях не сыдуць ад адказнасці. Гэта нагадванне пра тое, што свет сочыць за тым, што адбываецца, і міжнародная супольнасць салідарная з тымі, хто змагаецца за дэмакратыю, правы чалавека і вяршэнства закону.
Хаця сітуацыя ў Беларусі застаецца складанай, прыняцце гэтай рэзалюцыі дае пробліск надзеі і новае пачуццё рашучасці ўсім, хто працягвае змагацца за лепшую будучыню. Гэта нагадванне пра тое, што мы не самотныя ў сваёй барацьбе, і што міжнародная супольнасць падтрымлівае нас у барацьбе за справядлівасць і свабоду.
