7-9 верасня Святлана Ціханоўская выступіць на Эканамічным форуме ў Карпача, які таксама называюць польскім Давасам. Гэта самая буйная канферэнцыя ў Цэнтральнай і Усходняй Еўропе, у ёй прыме ўдзел 3 тысячы чалавек. Офісам Ціханоўскай падрыхтаваныя тры панэлі з удзелам беларускіх і міжнародных эканамістаў.
Ціханоўская выступіць з бачаннем развіцця сітуацыі ў Беларусі і будучых рэформаў для краіны. Яна правядзе перамовы з галоўнымі эканамістамі Еўропы, а таксама прадстаўнікамі інвестыцыйных банкаў і міжнародных арганізацый. У Польшчы Ціханоўская сустрэнецца са сваёй эканамічнай камандай на чале з Алесем Аляхновічам і прадставіць новых чальцоў.
Беларуская лідарка таксама правядзе каардынацыйную сустрэчу разам з лідарамі КР, НАК і іншых дэмакратычных сілаў, каб абмеркаваць рэформу Канстытуцыі і сумесную рэакцыю на спробы Лукашэнкі гандляваць незалежнасцю Беларусі. Дэмсілы рыхтуюць шэраг прапаноў па дапамозе Беларусі ў пераходны перыяд і пасля пераменаў.