Дарадца Святланы Ціханоўскай па моладзевай палітыцы і студэнцтву Маргарыта Ворыхава разам з прадстаўнікамі моладзевых арганізацыяў з Беларусі, Малдовы, Украіны, Азербайджана і Даніі сфармавалі план дзеянняў на 2024 год.
«Сетка моладзевых радаў» з’яўляецца аб’яднаннем нацыянальных моладзевых радаў пяці краінаў. Адным з вынікаў сумеснай працы падчас сустрэчы ў Кішынёве стаў план мерапрыемстваў, якія пройдуць у 2024 годзе, а менавіта:
✔️ Форум па правах моладзі Усходняга партнёрства 2024;
✔️ Міжнародны моладзевы фэст;
✔️ трэнінгі па нарошчванню патэнцыялу моладзевых арганізацый;
✔️ адвакацыя па Erasmus Plus: праца над тым, каб моладзь з рэгіёнаў мела роўныя магчымасці для доступу і атрымання выгод ад адукацыйных праграмаў.
Маргарыта Ворыхава адзначыла, што сумесная праца ўзмацняе голас моладзі, каб яе думка ўлічвалася пры абмеркаванні палітычных пытанняў:
«Дзякуючы сумесным стратэгіям мы дазваляем моладзі актыўна прасоўваць інклюзіўнасць і фармаваць свае супольнасці. Гэта дапаможа забяспечыць моладзі ўдзел у працэсах прыняцця рашэнняў, займаць кіруючыя пасады і бачыць, што іх пункт гледжання ўлічваецца. Супольныя высілкі дазволяць нам стаць важнымі ўдзельнікамі такіх міжнародных дыялогаў, як з Еўракамісіяй і ПАРЕ, і бараніць палітыку, якая падтрымлівае імкненні маладых людзей».
Таксама разам была распрацаваная стратэгія, якая паспрыяе паўнавартаснаму ўдзелу моладзі, пашырэнню яе правоў і магчымасцяў у рэгіёне Усходняга партнёрства. Акрамя таго, быў створаны дакумент па адвакацыі нацыянальных моладзевых радаў, дзе апісаны падыход да пашырэння магчымасцяў моладзі на розных узроўнях кіравання, а таксама – абароны яе правоў.
