Падчас візіту ў Мельбурн Святлана Ціханоўская разам з прадстаўнікамі беларускай дыяспары наведала парламент штата Вікторыя і сустрэлася з дэпутатамі.
У Аўстраліі парламенты і ўрады асобных штатаў маюць шырокія паўнамоцтвы.
Падчас сустрэчы абмеркавалі пытанні спрашчэння працэдураў легалізацыі і атрымання відаў на жыхарства для беларусаў у Аўстраліі, стварэнне ў парламенце групы падтрымкі дэмакратычнай Беларусі, а таксама магчымасць фінансавай дапамогі для Міжнароднага гуманітарнага фонду падтрымкі рэпрэсаваных. Асобна абмеркавалі тэму рэабілітацыі беларускіх добраахвотнікаў, якія змагаліся за Украіну і цяпер маюць патрэбу ў дапамозе. Падобныя праграмы ўжо дзейнічаюць для ўкраінскіх ветэранаў.
Падчас візіту Ціханоўская таксама сустрэлася з групай аўстралійскіх школьнікаў, якім распавяла пра сітуацыю ў Беларусі, пра тое, як беларусы змагаюцца за свабоду і дэмакратыю.
Напрыканцы Ціханоўская падарыла парламенту бел-чырвона-белы сцяг як сімвал сяброўства.
