Сёння беларуская лідарка распачала візіт у Партугалію. Адкрыла працоўную праграму сустрэча ў Лісабоне, дзе Святлану Ціханоўскую прыняў Луіш Мантэнегру. У гэтай паўднёвай краіне паўтара месяца таму памяняўся ўрад і сустрэча з Ціханоўскай стала адной з першых на вышэйшым узроўні для новага прэм’ера.
Кіраўніца Аб’яднанага пераходнага кабінета выказала спадзяванне на плённае і шчыльнае супрацоўніцтва з Партугаліяй, а таксама захаванне прынцыповай пазіцыі ў дачыненні да нашай краіны: ізаляваць рэжым Лукашэнкі, але не беларусаў.
Падчас сустрэчы Ціханоўская і Мантэнегру абмеркавалі пытанне санкцыяў, у прыватнасці — тых, што тычацца беларускіх калійных угнаенняў. Раней Партугалія была адной з краінаў, якая, паводле журналістаў, прапаноўвала змякчыць абмежаванні супраць гандлю ўгнаеннямі з Беларусі. Ціханоўская заклікала Партугалію і надалей прытрымлівацца санкцыённай палітыкі, пакуль не будуць вызваленыя палітвязні.
Беларуская лідарка прапанавала ўраду арганізаваць супольныя мерапрыемствы для абмену досведам у галіне пераходнай справядлівасці і вывучэння досведу Партугаліі ў пераходзе ад дыктатуры да дэмакратыі.
Кіраўніца Аб’яднанага пераходнага кабінета плануе таксама сустрэцца з міністрам замежных справаў Партугаліі, а таксама ўзяць удзел у Еўрапейскім Саміце “Concordia”, які прысвечаны міру і бяспецы ў Еўропе. Мерапрыемства пройдзе ў Порту ў закрытым фармаце і збярэ чыноўнікаў, палітыкаў і дыпламатаў з дзясяткаў краінаў свету.
