Святлана Ціханоўская ў інтэрв’ю ERR.ee падзялілася бачаннем сітуацыі ў Беларусі і стаўленнем нашых людзей да вайны і да рэжыму Лукашэнкі. Лідарка падкрэсліла: беларусы выступаюць супраць агрэсіі і не падтрымліваюць палітыку, якая робіць краіну ізгоем.
Вось ключавыя моманты размовы:
- Навошта Лукашэнка часткова вызваляе палітвязняў
«Нядаўнія выпускі палітвязняў, з аднаго боку, звязаныя з пастаянным ціскам на рэжым, а з другога боку – Лукашэнка хацеў бы адправіць сігналы Захаду: маўляў, глядзіце, у мяне тут акт гуманізму здарыўся, я выпускаю людзей. Вядома, гэта ўсё гульня, і нашая задача – не трапіцца на гэтыя хітрыкі. Мы такое ўжо бачылі ў мінулыя гады. І тут вельмі важна адзначыць: з-за кратаў выходзяць, напрыклад, 50 чалавек – за гэты ж перыяд часу ў турмы трапляе ў два разы больш».
- Ці могуць палітвязні ў рэжыме «інкамунікада» падаць прашэнне аб памілаванні
«Што тычыцца майго мужа або Віктара Бабарыкі, то, паколькі гэтыя людзі знаходзяцца ў рэжыме «інкамунікада» ўжо больш за год, мы не ведаем, ці прыходзілі да іх з такой прапановай, і як яны на гэта рэагавалі. Але агулам – гэта рашэнне кожнага чалавека. Калі чалавек напісаў прашэнне аб памілаванні, гэта ні ў якім разе не асуджаецца – таму што людзі невінаватыя. Калі ў гэтым адзіная магчымасць выратаваць жыццё, то людзі, відавочна, могуць гэта рабіць».
- Ці падтрымаюць беларусы Лукашэнку на #бязвыбары2025
«Ёсць, вядома, вельмі лаяльныя Лукашэнку людзі, якія заўсёды будуць да канца з ім. Але народ Беларусі хоча пераменаў, ён не хоча бачыць сваю краіну ізгоем – менавіта да гэтага пункту Беларусь прывёў Лукашэнка. Дыктатар супраць волі беларускага народа зрабіў нашую краіну суагрэсарам».
