На сустрэчы таксама выступілі старшыня Мюнхенскай канферэнцыі па бяспецы Вольфганг Ішынгер, міністр замежных справаў Польшчы Радаслаў Сікорскі, прэзідэнт Латвіі Эдгарс Рынкевічс, старшыня Атлантычнай рады Фрэдэрык Кемпэ і старшыня Ваеннага камітэта НАТА адмірал Джузэпэ Каво Драгонэ.
Ціханоўская выказала меркаванне, што сітуацыя ў бліжэйшыя год-два будзе вырашальнай не толькі для Украіны, але і для Беларусі. Яна заклікала аказваць усебаковую дапамогу Украіне, адначасова не забываючыся пра Беларусь. З аднаго боку — працягваць ціск на рэжым і дабівацца канкрэтных саступак, у тым ліку вызвалення людзей, з другога — рыхтавацца да сістэмных зменаў.
Ціханоўская адзначыла, што ў беларускім грамадстве існуе кансэнсус адносна захавання незалежнасці, і вельмі важна, каб дэмакратычны свет падтрымліваў гэтыя настроі, а таксама не дазваляў Расіі ператвараць Беларусь у ваенную базу.
Яна таксама заклікала рыхтавацца да постлукашэнкаўскай Беларусі, бо транзіт улады непазбежны, і тое, якім ён будзе, у значнай ступені залежыць ад геапалітычных падзей. Ціханоўская падкрэсліла, што задача дэмакратычных сілаў Беларусі — вярнуць краіну да дэмакратыі, захаваць незалежнасць і рэінтэграваць яе ў міжнародную супольнасць.
