Святлана Ціханоўская ўзяла ўдзел у міжнароднай канферэнцыі Impact у Познані. Цягам двух дзён спікеры абмяркоўваюць актуальныя пытанні для Еўропы – і закранаюць самыя розныя аспекты жыцця. У прыватнасці, поглядамі на праблемы рэгіёна і спосабы іх вырашэння дзеляцца палітыкі Мішэль Абама, Радаслаў Сікорскі і Сана Марын, навукоўцы Цімаці Снайдэр ды Іван Красцеў, кіраўнікі банкаў, зорныя спартсмены, спецыялісты ў сферы медыя і IT-тэхналогіяў.
Беларуская лідарка разважала на тэму перспектываў палітычных зрухаў у Беларусі і адказвала на пытанні.
Галоўныя тэзы пра сітуацыю ў Беларусі, якія агучыла Ціханоўская:
📌 «Тэрор і ціск. Беларусы жывуць ва ўмовах, якія нагадваюць сталінскія часы, з адвольнымі арыштамі і сталай нявызначанасцю. Рэжым імкнецца пасеяць страх і расчараванне сярод насельніцтва праз гвалт і русіфікацыю».
📌 «Падпольнае супраціўленне і інфармацыйная вайна. Нягледзячы на жорсткія рэпрэсіі, існуе актыўны падпольны супраціў – у тым ліку кіберактывісты і народная выведка. Расійская прапаганда актыўна дэзынфармуе і стварае шум, каб заблытаць людзей».
📌 «Адсутнасць падтрымкі ўлады з боку народа. Большасць беларусаў ненавідзяць Лукашэнку і стаміліся ад яго праўлення. Яго падтрымка трымаецца на сілавіках, спецслужбах і прарасійскай наменклатуры».
📌 «Палітычныя перавагі. Апытанні паказваюць: падтрымка Лукашэнкі знаходзіцца на ўзроўні каля 20%, у той час як большасць насельніцтва выступае за незалежнасць Беларусі і паляпшэнне стасункаў з ЕС. Пераважная большасць супраць удзелу ў вайне і наяўнасці ядзернай зброі».
Таксама Ціханоўская акрэсліла практычныя крокі, праз якія еўрапейская супольнасць можа дапамагчы беларусам:
✔️ Дапамога незалежным СМІ і грамадзянскай супольнасці;
✔️ Сінхранізацыя ціску на рэжым;
✔️ Візавая падтрымка і інтэграцыя;
✔️ Падтрымка еўрапейскай будучыні для Беларусі;
✔️ Супрацоўніцтва з дэмакратычнымі сіламі;
✔️ Прыцягненне рэжыму да адказнасці праз універсальную юрысдыкцыю.
