Святлана Ціханоўская падзякавала за тое, што Польшча прызнае беларускія дыпломы, нягледзячы на дэнансацыю дамовы рэжымам. Аліна Коўшык распавяла пра колькасць беларускіх школьнікаў у Польшчы – сёння гэта 26 тысячаў вучняў.
Абмеркавалі магчымасць арганізацыйнай і фінансавай дапамогі для стварэння сетак беларускіх школаў выхаднога дня з дадатковым беларускім кампанентам (мова, культура, гісторыя, геаграфія) для дзяцей вымушаных беларускіх мігрантаў у гарадах кампактнага пражывання дыяспары для процідзеяння палітыцы русіфікацыі і знішчэння нацыянальнай ідэнтычнасці, якая праводзіцца рэжымам Лукашэнкі пад уплывам Масквы. Першапачаткова гаворка ідзе пра сетку з каля 10-15 школаў у ваяводскіх гарадах Польшчы з магчымасцю працаўладкаваць настаўнікаў з Беларусі, якія маюць забарону на прафесію ўнутры Беларусі.
Падымалася пытанне магчымасці для вучняў з Беларусі, якія вучацца ў адным класе з дзеткамі-прадстаўнікамі беларускай меншасці ў Польшчы, наведваць заняткі беларускай мовы, якія па польскім заканадаўстве прадугледжаныя толькі для дзяцей з польскім грамадзянствам.
Святлана Ціханоўская падняла пытанне падтрымкі беларускіх студэнтаў, да прыкладу, пашырэнне фінансавання праграмы Каліноўскага для павелічэння колькасці месцаў набору ва ўніверсітэтах, пытанне пашырэння кафедраў Беларусістыкі ў польскіх ВНУ, а таксама магчымасць падтрымкі беларускіх выкладчыкаў.
Ціханоўская падзякавала міністру за стратэгічную падтрымку праекта Вольны Беларускі Універсітэт, курсы якога скіраваныя на падрыхтоўку менеджараў для правядзення рэформаў і трансфармацыі будучай Беларусі і на ўзмацненне ідэнтычнасці беларусаў (кіраўнік – Аляксандр Мілінкевіч).
Павел Латушка распавёў пра праект кадравага рэзерву для новай Беларусі, падрыхтоўку новых элітаў на еўрапейскім досведзе ў галінах:
– дзяржаўныя фінансы і бюджэтны працэс;
– менеджмент арганізацыі і кіраванне праектамі;
– сацыяльныя сістэмы і сацыяльная палітыка;
– нацыянальная бяспека;
– еўрапейская інтэграцыя.
Стажыроўкі ў Мінадукацыі, ваяводскіх і павятовых аддзелах адукацыі Польшчы для пераймання досведу беларусамі.
Напрыканцы сустрэчы абмеркавалі стварэнне працоўнай групы з Аб’яднаным Пераходным Кабінетам па справах адукацыі ў Міністэрстве Адукацыі і Навукі.
