Першы намеснік прэм’ер-міністра Беларусі заяўляе аб гістарычным узроўні беларускіх заробкаў за апошнія 10 гадоў? Ці сапраўды ёсць чым ганарыцца?
Каментуе дарадца Святланы Ціханоўскай па эканамічных рэформах Алесь Аляхновіч:
«Давайце паглядзім на вынікі ў даляравым эквіваленце. За 10 гадоў намінальная вартасць нашай эканомікі скарацілася на 9%. Калі на піку, у 2014, Беларусь вырабіла тавараў і паслуг на суму эквівалентную $79 млрд., то ў 2023 гэта было толькі $73 млрд. І гэта не ўлічвая абясцэньвання даляра за гэты час на 30%. Іншымі словамі, 1 даляр з 2014 г. быў варты 1,3 даляра ў 2023 г.
Для параўнання, за гэты час нашы суседзі паказалі адметна лепшы вынік:
- Намінальны ВУП (валавы ўнутраны прадукт) Латвіі вырас на 40%, Польшчы – на 50%, Літвы – на 60%;
- Нават ВУП Украіны ў 2023 г. быў на траціну вышэйшым, чым у 2014 г.;
- А вось эканоміка РФ, да якой Лукашэнка вельмі моцна прывязаў нашу эканоміку, скарацілася на 2%;
- Яшчэ большы кантраст ствараюць нашы далейшыя суседзі па «камуналцы», званай СССР. У Арменіі намінальны ВУП вырас больш, чым на 100%, у Малдове – на 75%, а ў Грузіі, нават пасля сыходу Саакашвілі, ВУП вырас на 70%.
Нядзіўна, што ў выніку страчанага дзесяцігоддзя, заробкі беларусаў у даляравым эквіваленце адкаціліся да звання еўрапейскага аўтсайдара».
Калі ў 2014 г. беларусы зараблялі ў сярэднім $592 «бруднымі», то ў 2023 г. заробак вырас усяго толькі на 8% – да $638 паводле афіцыйнай статыстыкі. А нагадаю, што даляр за гэты час абясцэніўся на 30%, значыць у сапраўднасці беларусы зусім не сталі багацейшымі за гэты час, як заяўляюць беларускія чыноўнікі.
А як жа там нашы суседзі? Каб не пералічваць усіх, скажу толькі, што летась па заробках нас абагнала самая бедная краіна Еўропы – Малдова. Заробак у Малдове вырас на 130% да $680. Адрыў ад беларусаў склаў $50 летась, і вырас да $100 у 2 квартале бягучага году.
З такім кіраўніком і стагнуючым хаўруснікам з Усходу адставанне ад суседзяў будзе толькі нарастаць.
