«Паважанае спадарства,
Паважаныя чальцы Парламенцкай Асамблеі
Дарагія сябры, студэнты,
Для мяне вялікі гонар выступіць з асноўным дакладам на гэтым круглым стале, і я шкадую, што не магу прысутнічаць сёння асабіста.
Барацьба за дэмакратыю мае патрэбу ў сваіх чэмпіёнах — тых, хто прысвячае ёй сваё жыццё і ставіць на карту сваю свабоду ў імя яе.
Адзін з іх — наш лаўрэат Нобелеўскай прэміі міру Алесь Бяляцкі. За тое, што ён усё жыццё выступаў за правы чалавека і дэмакратычныя пераўтварэнні, рэжым Лукашэнкі асудзіў яго да 10 гадоў зняволення. Яго змясцілі ў задушлівую турэмную камеру і трымаюць у ізаляцыі разам з тысячамі іншых палітычных вязняў.
Алесь Бяляцкі пісаў: «Каштоўнасць сапраўднай дэмакратыі заключаецца ў заахвочванні адказнасці, маральнасці і творчасці ў грамадстве».
Гэтыя тры прынцыпы з'яўляюцца ключавымі для пабудовы моцнага і свабоднага грамадства. У той час як дыктатура Лукашэнкі абыходзіцца без гэтых рэчаў: яна сумная, амаральная і безадказная.
Барацьба дэмакратыі супраць тыраніі не можа быць выйграная, калі мы не падзяляем гэтыя прынцыпы. Дэмакратычныя краіны павінны выступіць адзіным фронтам і дапамагчы тым, хто працягвае барацьбу.
У 2020 годзе народ Беларусі ясна даў зразумець, што ён абраў дэмакратыю. Мы перамаглі на выбарах, мы з’ядналі беларускія гарады. Людзі на вуліцах крычалі: «Свабода!». Аднак рэжым адказаў жорсткім тэрорам, які спачатку прывёў да масавых рэпрэсій, а потым адчыніў дзверы ў вайну супраць Украіны, дзе рэжым Лукашэнкі стаў памагатым Пуціна.
Хаця мы працягваем нашую барацьбу ў падполлі, мы разумеем, што не можам выйграць гэтую барацьбу ў адзіночку. Нам патрэбныя моцныя саюзнікі і міжнародная салідарнасць. Нам трэба, каб дэмакратычны свет стаў на наш бок. Гэта адзіны спосаб спыніць беспакаранасць, адрадзіць надзею людзей і зрабіць так, каб дэмакратыя перамагла.
Я веру, што Беларусь стане гісторыяй поспеху пераходу ад тыраніі да дэмакратыі. Я веру, што Беларусь стане ключом да еўрапейскай бяспекі. Свабодная Беларусь будзе наймацнейшай санкцыяй супраць пуцінскай Расіі і вялікім унёскам у перамогу Украіны.
Выступаючы супраць дыктатараў, мы адстойваем тое, што правільна. Мы даем людзям надзею на лепшую будучыню. Супрацьдзеянне дыктатарам — гэта наш маральны абавязак.
Правы чалавека і вяршэнства закону — гэта такія моцныя прынцыпы, таму што яны паважаюць годнасць чалавека. Дыктатары не бачаць каштоўнасці ў чалавечай годнасці. А мы, дэмакраты, бачым.
Я веру, што Беларусь стане краінай, дзе будуць паважаць правы чалавека і вяршэнства закону. Дзе адказнасць, маральнасць і творчасць стануць нашым дэвізам.
Я ведаю, што шлях да дэмакратыі можа быць доўгім і цяжкім, але давайце пройдзем яго разам.
Дзякуй».
