Святлана Ціханоўская выступіла з прамовай на адкрыцці круглага стала ў Сейме Літвы, прысвечанага ролі Беларусі ў рэгіянальнай бяспецы і супрацоўніцтву з дэмакратычнымі сіламі.
У мерапрыемстве ўзялі ўдзел спікер Сейма Юозас Олекас, віцэ-міністарка замежных справаў Літвы Аўдра Плепіце, намеснік маршалка Сената Польшчы Міхал Каміньскі, а таксама літоўскія парламентарыі, прадстаўнікі ўраду, эксперты і прадстаўнікі беларускай дэмакратычнай супольнасці. Дыскусіі былі прысвечаныя стратэгіі Літвы адносна Беларусі, ролі беларусаў у развіцці краіны, а таксама ўдзелу моладзі ў палітычных трансфармацыях.
Гэтая сустрэча стала важнай пляцоўкай для каардынацыі пазіцыяў і выпрацоўкі агульнага бачання: як падтрымліваць беларусаў, узмацняць ціск на рэжым і рыхтавацца да будучых дэмакратычных зменаў.
Сярод тэмаў мерапрыемства:
– неабходнасць працягваць палітыку непрызнання рэжыму;
– падтрымка палітвязняў і патрабаванне поўнай амністыі;
– роля санкцыяў як інструмента для дасягнення сістэмных зменаў;
– важнасць міжнароднай адказнасці за злачынствы рэжыму;
– паглыбленне супрацоўніцтва паміж Беларуссю і Літвой.
Святлана Ціханоўская:
«Толькі свабодная, незалежная, еўрапейская Беларусь, без расійскага кантролю, зможа гарантаваць бяспеку Літве, Польшчы, Латвіі і Украіне. А пакуль у Беларусі пануе гэты рэжым — гэта заўжды будзе ствараць пагрозы для суседзяў. І давайце не будзем наіўнымі: Лукашэнка служыць Расіі. Яму нельга давяраць і яго нельга «ўлагодзіць». Ён ужо не раз падманваў Літву, Польшчу і Еўрасаюз — і зробіць гэта зноў».
