Беларуская лідарка пачала працоўны візіт у Аўстрыю з удзелу ў Саміце грамадзянскай супольнасці ў рамках ініцыятывы Усходняга партнёрства. У мерапрыемстве прынялі ўдзел прадстаўнікі грамадзянскай супольнасці, палітыкі, актывісты, а таксама высокія чыноўнікі з Арменіі, Азербайджана, Грузіі, Малдовы і Украіны
Ціханоўская падкрэсліла: «Галоўны страх любой дыктатуры – самаарганізацыя людзей, іх адзінства. Менавіта гэта адбылося ў Беларусі. Грамадзянская супольнасць – асноўная пагроза для дыктатуры, неабходная для развіцця дэмакратыі».
Акрамя таго, лідарка прапанавала 5 крокаў, якія ўжо цяпер можна зрабіць у рамках Усходняга партнёрства для падтрымкі дэмакратычнай Беларусі:
- Развіваць сумесныя праекты і супрацоўніцтва.
«Беларускія НКА, нізавыя ініцыятывы, незалежныя СМІ і культурніцкія праекты змагаюцца за выжыванне. Рэсурсы, якія немагчыма выкарыстаць у лукашэнкаўскай Беларусі, варта накіраваць на праекты грамадзянскай супольнасці для свабоднай Беларусі».
- Умацоўваць сувязі паміж людзьмі, працаваць над мабільнасцю – візамі, абменамі.
«Дыктатары кажуць, што ў Еўропе нас ніхто не чакае. Мы павінны даказаць, што яны памыляюцца. Праз Усходняе партнёрства мы можам паслаць ясны сігнал, што дзверы Еўропы будуць адкрытыя для дэмакратычнай Беларусі».
- Умацоўваць рэгіянальнае супрацоўніцтва.
«Пакуль дыктатары аб’ядноўваюцца і вучацца адзін у аднаго, мы таксама павінны заставацца адзінымі. Пад эгідай Усходняга партнёрства мы можам арганізоўваць сумесныя мерапрыемствы».
- Падтрымліваць кампаніі па вызваленні беларускіх палітвязняў.
«Гэта мой асабісты боль. Цяпер за кратамі знаходзяцца не менш за 1300 чалавек, многія з іх утрымліваюцца без сувязі са знешнім светам».
- Думаць маштабна.
«У той час як дыктатар пакінуў Усходняе партнёрства, мы, беларусы, гэтага не зрабілі. Давайце спынім практыку «пустога крэсла» і запросім на саміт «Усходняга партнёрства» прадстаўнікоў дэмакратычнай Беларусі».
