У складзе дэлегацыі Ціханоўскай былі Валер Кавалеўскі і Павел Латушка. Ціханоўская падзякавала Дуду за ініцыяваны Польшчай і прыняты ЕС План дапамогі для дэмакратычнай Беларусі і ўсебаковую дапамогу Беларусі: праграму Каліноўскага, падтрымку незалежных медыя, у тым ліку «Белсат», дапамогу людзям і бізнесам, якім давялося рэлакавацца, падтрымку Цэнтра беларускай салідарнасці і Беларускага дома.
На сустрэчы Дуда, Ціханоўская, Латушка і Кавалеўскі абмеркавалі:
- Як дапамагчы бацькам Пратасевіча і пераканацца, што вінаватыя ў захопе самалёта панясуць адказнасць;
- Як паскорыць працэс завядзення спраў па ўніверсальнай юрысдыкцыі ў Польшчы, бо ў гэтую краіну з'ехала вельмі шмат беларусаў, якія ратаваліся ад пераследу рэжымам;
- Як узмацніць эканамічны і палітычны ціск на Лукашэнку з дапамогай санкцый і прызнання рэжыма тэрарыстычным.
Ціханоўская адзначыла недапушчальнасць гандлю палітвязнямі: «Усе нявінныя людзі павінны выйсці на свабоду. Гэта не можа быць прадметам гандлю. Мы бачылі, у якім стане Раман – ён закладнік рэжыму – і мы павінны зрабіць усё, каб вызваліць Рому і тысячы людзей, якія знаходзяцца ў такіх жа нялюдскіх умовах».
Ранкам да сустрэчы з Дудам Ціханоўская сустрэлася з мэрам Варшавы Рафалам Тшаскоўскім – з нагоды адкрыцця мемарыяла беларускай салідарнасці. Ціханоўская і Тшаскоўскі разам правялі прэс-канферэнцыю, беларуская лідарка падзякавала мэру за падтрымку беларусаў і іх ініцыятыў і за тое, што магчымасць рэлакацыі ў Варшаву стала выратаваннем для многіх з іх.
