Дасылайце, калі ласка, інфармацыю пра ўсё, што тычыцца адукацыі ў Беларусі, у наш бяспечны і ананімны чат-бот @eduOST_bot. Паведамляйце нам навіны са сваёй установы адукацыі ці дзяржаўнага ведамства датычна рэпрэсій і розных формаў ціску з боку кіраўніцтва, пішыце нам пра факты карупцыі і новыя распараджэнні, якія здаюцца вам неабгрунтаванымі ці нерацыянальнымі. Таксама запрашаем вас дзяліцца сваімі ідэямі і прапановамі па рэфармаванні сістэмы адукацыі.
У нас з’явіўся сайт www.asvetaby.org, на якім можна знайсці ўсе выпускі дайджэста «Асвета» на беларускай, рускай і англійскай мовах.
- Міжнародныя магчымасці
– Дарагія чытачы! Звяртаем Вашу ўвагу, што ў асобным дадатку Падтрымка на 2023 год прадстаўлены вялікі агляд актуальных міжнародных магчымасцяў на цэлы год наперад. Агляд не дублюе магчымасці, уключаныя ў гэты выпуск.
– Упсальскі ўніверсітэт праводзіць апытанне беларускіх навукоўцаў (магістраў, аспірантаў, кандыдатаў і дактароў навук). Апытанне складаецца з 20 кароткіх пытанняў на англійскай мове. Апытанне праводзіцца ананімна і мае мэту ацаніць прафесійныя патрэбы беларускіх вучоных у сучасных умовах у краіне і за мяжой. Адказы ўдзельнікаў апытання дапамогуць у распрацоўцы стратэгіі дзейнасці шведскіх універсітэтаў, накіраванай на супрацоўніцтва з беларускімі навукоўцамі.
– Цэнтр новых ідэй сумесна з Фондам Фрыдрыха Эберта запускае адукацыйны курс «Акадэмія беларускай дыпламатыі» для беларускіх грамадскіх лідараў ва ўзросце да 35 гадоў. Мэтай курса з'яўляецца фармаванне ў навучэнцаў цэласнага разумення знешняй палітыкі Беларусі і вызначэнне ключавых выклікаў, якія стаяць перад Беларуссю на міжнароднай арэне. Праграма навучання ўключае 16 анлайн-заняткаў і практычныя заняткі ў Варшаве на выходных. Заняткі працягнуцца з 21 сакавіка па 11 траўня. Апошні тэрмін падачы заяўкі – 15 траўня 2023.
– Цэнтр даследавання міжэтнічных адносін Усходняй Еўропы (Харкаў, Украіна) адкрыў прыём заявак на ўдзел у трэцяй летняй школе «Даследаванні памежжа ў Цэнтральна-Усходняй Еўропе і Чарнаморскім рэгіёне», якая адбудзецца ў Кішынёве (Малдова). Летняя школа праводзіцца для магістрантаў, аспірантаў, маладых навукоўцаў і практыкуючых спецыялістаў. Яе мэта – арганізацыя форуму для міждысцыплінарных дыскусій па тэмах, звязаных з памежжам у такіх сферах навукі, як антрапалогія, гісторыя, эканоміка, паліталогія, сацыялогія, культуралогія. Удзел з'яўляецца бясплатным. Арганізатары забяспечваюць пражыванне падчас правядзення школы, абеды, і часткова пакрываюць дарожныя выдаткі. Апошні тэрмін падачы заяўкі – 15 красавіка 2023 года.
– Еўрапейскі Саюз у межах праграмы «EU4Belarus – SALT-II (Support for Advanced learning and training)» аб'яўляе прыём заявак на атрыманне фінансавай падтрымкі ў памеры да 1450 еўра на вывучэнне адной з еўрапейскіх моў (на выбар суіскальніка) і здачы па ім іспыту. Праграма прызначана для беларускіх студэнтаў, якія былі палітвязнямі. Больш падрабязна пра ўмовы праграмы можна даведацца на сайце арганізатара.
– Літоўскі Фонд падтрымкі адукацыйных абменаў прапануе дзяржаўныя стыпендыі і гранты грамадзянам Беларусі для атрымання ступені магістра ў вышэйшых навучальных установах Літвы на 2023 год. Памер стыпендыі складае 490 еўра на месяц, грант пакрывае выдаткі на навучанне. Апошні тэрмін падачы заяўкі – 22 траўня 2023.
– Літоўскі фонд падтрымкі адукацыйных абменаў прапануе штомесячную стыпендыю і грант на пакрыццё выдаткаў на навучанне ва ўніверсітэтах Літвы на працягу 1-2 семестраў. Памер стыпендыі складае 490 еўра на месяц для студэнтаў і 980 еўра на месяц для аспірантаў. Апошні тэрмін падачы заяўкі – 8 траўня 2023.
– Інстытут славяназнаўства Венскага ўніверсітэта запрашае даследчыкаў прыняць удзел у даследчым праекце ў сферы ўсходнеславянскай лінгвістыкі ў аспірантуры Інстытута. Патрабаванні да кандыдата: наяўнасць ведаў і навыкаў у сферы лічбавых гуманітарных навук і/або навыкаў філалагічнага або корпусна-лінгвістычнага аналізу тэкстаў, веданне адной з усходнеславянскіх моў, а таксама англійскай і нямецкай. Удзельніка праекта будзе магчымасць працаваць над сваёй дысертацыяй і атрымаць досвед выкладання. Прапанова разлічана на 4 гады. Падрабязней па вакансіі на сайце ўніверсітэта. Апошні тэрмін падачы заяўкі – 27 сакавіка.
– Адкрыты прыём заявак на ўдзел у праграме Fulbright Teaching Excellence and Achievement (TEA) для настаўнікаў ды іншых спецыялістаў у сферы сярэдняй адукацыі. Праграма разлічана на шэсць тыдняў і ўключае наведванне семінараў у амерыканскіх ВНУ. Удзел у праграме дазволіць павысіць сваю кваліфікацыю і абмяняцца досведам з выкладчыкамі з ЗША. Прыняць удзел у праграме могуць выкладчыкі англійскай і іншых замежных моў, матэматыкі, прыродазнаўчых і грамадскіх навук, а таксама іншыя спецыялісты, якія працуюць у сферы адукацыі. Апошні тэрмін падачы заяўкі – 3 красавіка. Дадатковую інфармацыю можна атрымаць, напісаўшы на пошту арганізатарам: [email protected]
– Фонд Фрыдрыха Эберта прапануе стыпендыі на навучанне па праграмах магістратуры ў летнім семестры 2024 г. Студэнты будуць атрымліваць штомесячную стыпендыю ў памеры ад 830 да 850 еўра ў залежнасці ад праграмы навучання. Таксама пакрываюцца выдаткі на медыцынскае страхаванне, студэнты з дзецьмі змогуць атрымаць сямейную дапамогу ў памеры 276 еўра. Адным з крытэрыяў адбору з'яўляецца веданне англійскай і нямецкай моў. Апошні тэрмін падачы заяўкі – 31 траўня.
– Цэнтр усходнееўрапейскіх даследаванняў Варшаўскага ўніверсітэта прапануе стыпендыі для навучання на 2-х гадавой магістарскай праграме, прысвечанай гісторыі і сучаснасці краін Цэнтральнай і Усходняй Еўропы, Расіі і ўсёй посткамуністычнай прасторы. У межах праграмы разглядаюцца пытанні гісторыі, нацыянальнай культуры, асноўных тэндэнцый палітычнага развіцця рэгіёна, а таксама мастацтва, літаратуры, сацыялогіі, геаграфіі, дэмаграфіі, юрыспрудэнцыі, эканомікі ды інш. Стыпендыя ў памеры 3000 еўра на год пакрывае кошт навучання, а таксама кошт курсаў польскага мовы (2 семестры). Акрамя таго, студэнты будуць атрымліваць штомесячныя выплаты ў памеры 1500 злотых для пакрыцця выдаткаў на пражыванне. Апошні тэрмін падачы заяўкі – 10 красавіка.
– Міжнародны Вышаградскі фонд прапануе стыпендыі для студэнтаў усіх узроўняў навучання ва ўніверсітэтах краін Вышаградскай групы (Чэхія, Венгрыя, Польшча, Славакія). Стыпендыя пакрывае кошт навучання ў памеры 1500 эўра на семестр, а таксама прапануе студэнтам фінансавую падтрымку ў памеры 2500 еўра на семестр. Апошні тэрмін падачы заяўкі – 15 красавіка.
– Урад Славацкай Рэспублікі ў межах нацыянальнай стыпендыяльнай праграмы для замежных студэнтаў усіх узроўняў навучання прапануе штомесячныя стыпендыі тэрмінам да 10 месяцаў для навучання ці ўдзелу ў навуковых даследаваннях у акадэмічных установах Славакіі. Памер стыпендыі для студэнтаў складае 400 еўра, для аспірантаў, выкладчыкаў, мастакоў і артыстаў ад 734 да 1050 еўра (у залежнасці ад навуковай ступені). Апошні тэрмін падачы – 30 красавіка.
– Цэнтр перспектыўных даследаванняў у Сафіі (CAS Sofia) прапануе стыпендыі ім. Герды Хенкель для даследчыкаў у сферы сацыяльных і гуманітарных навук, якія маюць доктарскую ступень, а таксама міжнародны даследчы досвед (удзел у праектах і канферэнцыях). Працягласць стажыроўкі – да 5 месяцаў. Стыпендыятам прадастаўляецца: стыпендыя ў памеры 850 еўра (абкладаецца падаткам у памеры 10 адсоткаў) для пакрыцця расходаў, звязаных са знаходжаннем у Сафіі; размяшчэнне ў Сафіі, уключна з жытлом і працоўнай прасторай; праезд з краіны пражывання ў Сафію і назад, выдаткі на візу і страхоўку (да 800 еўра); аднаразовая дапамога на паездку за мяжу з навуковымі мэтамі ў перыяд стажыроўкі (да 1200 еўра); выдаткі на даследаванні (100 еўра на месяц). Стыпендыяты таксама будуць мець бясплатны доступ да бібліятэкі, электронных рэсурсаў і баз даных Цэнтра. Апошні тэрмін падачы заяўкі — 31 сакавіка 2023 года.
– Вядучыя акадэмічныя ўстановы ЕС і ЗША, уключна з Інстытутам Макса Планка, Тэхнічным універсітэтам Мюнхена, Аўгсбургскім універсітэтам у межах сумеснай праграмы прапануюць студэнтам, у якіх ужо ёсць ступень бакалаўра, стыпендыю MIPLC для працягу адукацыі па юрыдычнай спецыяльнасці. У межах стыпендыяльнай праграмы пакрываецца кошт навучання ў памеры 32.850 еўра. Апошні тэрмін падачы заяўкі – 30 красавіка.
– Цэнтр усходнееўрапейскіх даследаванняў (CEES) Цюрыхскага ўніверсітэта прапануе стыпендыі для даследчыкаў у сферы сацыяльных і гуманітарных навук па тэмах, якія адносяцца да Расіі і краін Цэнтральнай і Усходняй Еўропы, Каўказа і Цэнтральнай Азіі. Стыпендыя выдаецца на 1 семестр і пакрывае пражыванне на працягу 4 месяцаў, выдаткі на праезд, медыцынскую страхоўку, візавую падтрымку. Апошні тэрмін падачы заяўкі – 15 красавіка 2023 года.
– Форум Эйнштэйна і Фонд Вітэнштэйна прапануюць стыпендыі для замежных студэнтаў, якія жадаюць праводзіць даследаванні ў сферы гуманітарных, сацыяльных або прыродазнаўчых навук. Стыпендыяты будуць жыць у летнім доме Альберта Эйнштэйна ў Капуце (Германія) на працягу 5-6 месяцаў і атрымаюць грант у памеры 10 000 еўра. Патрабаванні да суіскальнікаў: узрост да 35 гадоў, дыплом аб вышэйшай адукацыі ў сферы гуманітарных, сацыяльных або прыродазнаўчых навук, прапанова міждысцыплінарнага праекта, які не звязаны з папярэднімі даследаваннямі, добрае валоданне англійскай мовай. Апошні тэрмін падачы заяўкі — 15 траўня 2023.
– У лютым 2023 г. фонд «Ратары» (The Rotary Foundation) адкрыў конкурс на ўдзел у праграме «Rotary Peace Fellowship» на 2024-2025 гг. для атрымання ступені магістра ў сферы вывучэння свету і развіцця ў шасці вядучых універсітэтах свету. Стыпендыя пакрывае пражыванне і харчаванне, транспартныя выдаткі, медыцынскае страхаванне, розныя выдаткі на навучанне ды інш. Апошні тэрмін падачы заяўкі — 15 траўня 2023 года.
– Гарвардскі ўніверсітэт прапануе стыпендыю, якая пакрывае 75% ад кошту навучання ў межах праграмы «The Harvard MBA», а таксама выдаткі на праезд і пражыванне. Кандыдаты могуць падаць заяўку на атрыманне стыпендыі толькі пасля атрымання прапановы па залічэнні на праграму «The Harvard MBA». Апошні тэрмін падачы заяўкі – 31 траўня 2023.
– Міжнародная летняя школа (ISS) у Інстытуце малекулярнай біялогіі (Майнц, Германія) запрашае студэнтаў і магістрантаў, якія навучаюцца ў сферы малекулярнай біялогіі, узяць удзел у 6-тыднёвай стажыроўцы, якая пройдзе з 17 ліпеня па 25 жніўня ў Майнцы. Праграма пакрывае выдаткі на навучанне, пражыванне, а таксама транспартныя выдаткі ад краіны пражывання да месца навучання. Апошні тэрмін онлайн рэгістрацыі – 5 красавіка 2023 г.
– Працягваецца прыём заявак на ўдзел у праграме падрыхтоўкі студэнтаў з Беларусі да паступлення ў амерыканскія ўніверсітэты для атрымання ступені магістра ці доктара (Graduate Students Advising Program). Бясплатны 5-месячны анлайн-курс з удзелам 10 трэнераў па 15 розных тэмах дае поўнае разуменне працэсу паступлення на праграмы магістратуры ці дактарантуры ў навучальныя ўстановы ЗША. Для адабраных удзельнікаў прадастаўляюцца дадатковыя магчымасці: бясплатны доступ на анлайн-платформы самападрыхтоўкі па англійскай мове (Kuder, Magoosh, Peterson's); магчымасць здаць бясплатна іспыт Duolingo; для найбольш актыўных удзельнікаў – бясплатная здача TOEFL, GRE, GMAT. Паспяховае завяршэнне Graduate Student Advising Program з'яўляецца адным з крытэрыяў заяўкі на праграму Opportunity, якая прадугледжвае фінансавую падтрымку ўрада ЗША для паступлення.
- Грамадзянская супольнасць і адукацыя
– Беларускія дзеячы культуры і адукацыі прапануюць бацькам дзяцей, якія пражываюць у Польшчы, прайсці апытанне на тэму дадатковай адукацыі для беларускіх дзяцей. Апытанне праводзіцца для таго, каб вызначыць, наколькі істотная патрэба беларусаў у тым, каб іх дзеці вывучалі такія прадметы, як беларуская мова, гісторыя, літаратура ды інш. у дадатак да базавай адукацыі, якую яны атрымліваюць у польскіх школах. Адказы ўдзельнікаў апытання могуць узмацніць аргументацыю беларускіх арганізацый у дыялогу з уладамі Польшчы па магчымасці рэалізацыі розных адукацыйных беларускіх праектаў у Польшчы.
– У новым тэлеграм-канале праекту «Васьміног: адукацыя для беларускіх дзяцей сёння і заўтра» выйшла публікацыя пра беларускія школы і заняткі для дзяцей у Польшчы, Англіі і Швецыі. Паводле апублікаванай інфармацыі, дзеці па заяве бацькоў зараз змогуць вывучаць беларускую мову ў шведскіх школах; у Лондане адкрылася нядзельная беларуская школа, якая запрашае на першыя заняткі «Гуканне вясны»; у Польшчы шырокія адукацыйныя магчымасці для дзяцей — ад курсаў па фатаграфіі да заняткаў па англійскай мове — дае школа мастацтваў ім. М.Равенскага, «Цэнтр беларускай салідарнасці» і адукацыйныя ініцыятывы ва Уроцлаве і Беластоку.
– Выйшаў першы нумар беларускамоўнага навукова-папулярнага часопіса «Pamyłka». Яго стваральнікі – беларускія навукоўцы, якія маюць намер расказваць шырокай аўдыторыі пра найноўшыя навуковыя дасягненні на беларускай мове. Таксама стваральнікі часопіса запрашаюць у сваю каманду рэдактараў, аўтараў і адзначаюць, што для напісання артыкулаў у часопіс не абавязкова мець якую-небудзь вучоную ступень. Выданне часопіса ажыццяўляецца за кошт ахвяраванняў, а самі матэрыялы публікуюцца з дазволам далейшага распаўсюджвання пры ўмове ўказання аўтара — такім чынам стваральнікі часопіса хочуць заахвоціць неабмежаваны распаўсюд навуковых ведаў.
– «Беларускі моладзевы хаб» запрашае па аўторках на вячэрнія заняткі па беларускай мове, якія праводзяць вопытныя выкладчыкі-беларусісты Варшаўскага ўніверсітэта. Заняткі праводзяцца для дарослых і маюць практычны характар (дапамагаюць навучыцца выкарыстоўваць беларускую мову ў паўсядзённым жыцці). Удзел у занятках бясплатны, аднак навучэнцы могуць пакінуць ахвяраванне, якое будзе накіраванае на дапамогу беларускім палітвязням. Для ўдзелу неабходна прайсці рэгістрацыю.
– Гомельская актывістка і валанцёр, былая настаўніца Анастасія Сасыкбаева пасля пераезду ў Польшчу адкрыла беларускі клуб для дзяцей «Спадчына» ў г. Уроцлаў. На занятках дзеці вывучаюць беларускую мову, наведваюць тэатральныя заняткі і музеі, глядзяць тэматычныя кінафільмы. У будучыні плануюцца заняткі і пікнікі на свежым паветры, экскурсіі, турыстычныя паездкі. Галоўнае, паводле слоў стваральніцы клуба, каб дзеці пасябравалі і сталі супольнасцю, у цэнтры інтарэсаў якой — беларуская мова і культура. Пра дзейнасць клуба Сасыкбаева расказала ў інтэрв'ю.
– На канале «Маланка Live» адбылася дыскусія на тэму дзяржаўнай палітыкі ў сферы адукацыі ў Беларусі. У дыскусіі прыняла ўдзел дарадца Святланы Ціханоўскай па пытаннях адукацыі і навукі, прафесар ЕГУ Таццяна Шчытцова і прадстаўнікі моладзевых беларускіх арганізацый – сакратар Беларускай нацыянальнай моладзевай рады «Рада» Зміцер Герыловіч, сакратар па знешніх сувязях Супольнасці беларускіх студэнтаў Лізавета Даўгулевіч, актывіст супольнасці «Беларускае студэнцтва Чэхіі» Аляксандр Паршанкоў. Удзельнікі абмеркавалі праблему моладзевай палітыкі ў сучаснай Беларусі, выявілі падкрэслена аўтарытарны характар удзелу дзяржавы ў ёй, расказалі пра тое, як па-рознаму можа ажыццяўляцца дзяржавай оладзевая палітыка ў дэмакратычных краінах, і падзяліліся сваім бачаннем магчымых шляхоў рэфармавання нацыянальнай сістэмы адукацыі ў Беларусі.
– Дарадца Святланы Ціханоўскай па пытаннях адукацыі і навукі Таццяна Шчытцова пракаментавала вынікі нядаўняга апытання, праведзенага ініцыятывай «Chatham House», паводле якога 70% апытаных беларусаў выступаюць за захаванне дзвюх дзяржаўных моў: «Гэта адзін з галоўных і складаных выклікаў для сучасных дэмсіл. Я перакананая: было б супраць інтарэсаў беларускай мовы, і супярэчыла б асабліваму этасу, які звязаны з ім, калі б мы пачалі прасоўваць яго сілком».
- Рэпрэсіі
– 10 сакавіка вядомую выкладчыцу-італьяністку, былога дацэнта МДЛУ, палітвязня Наталлю Дуліну асудзілі на 3,5 гады калоніі агульнага рэжыму, прызнаўшы вінаватай у «арганізацыі і падрыхтоўцы дзеянняў, якія груба парушаюць грамадскі парадак альбо актыўным удзеле ў іх» (арт. 342 КК РБ) . Суд адбываўся ў закрытым рэжыме. Суддзя, якая вынесла прысуд – Вікторыя Палішчук.
– Сталі вядомыя новыя падрабязнасці рэпрэсій выкладчыкаў у ліцэі БДУ: супрацоўнікі КДБ склалі спісы выкладчыкаў на звальненне, у якія ўключаны імёны каля 30 супрацоўнікаў ліцэя — удзельнікі пратэстаў, асобы, якія пераводзілі сродкі на падтрыманне розных пратэстных ініцыятыў, і тыя, хто ставіў подпісы за альтэрнатыўных кандыдатаў у час выбарчай кампаніі 2020 г.
– Для навучэнцаў аграрнага каледжа г. Лунінца мясцовая пракуратура зладзіла «шоў» у актавай зале ў выглядзе ўзяцця пад варту 43-гадовага жыхара Лунінца. Мужчыну абвінавацілі ў «арганізацыі групавых дзеянняў, якія груба парушаюць грамадскі парадак» за пратэстныя каментары ў інтэрнэце. Па словах прэс-службы пракуратуры, мерапрыемства было праведзена з мэтай «папярэджання магчымых аналагічных злачынстваў»
- Палітыка рэжыму
– Па ўсёй Беларусі ў дзіцячых садах і школах прайшлі мілітарысцкія акцыі з удзелам вайскоўцаў і выкарыстаннем вайсковай тэхнікі і зброі, прымеркаваныя да 23 лютага. «Радыё Свабода» зрабіла агляд падобных мерапрыемстваў і ўзяла каментар у псіхолага на тэму іх уплыву на псіхіку дзяцей: «небяспека крыецца зусім не там, дзе звычайна думаюць людзі».
– Тры выкладчыцы беларускіх ВНУ — Марыя Канюшкевіч, Ірына Зайцава, Алена Муратава — прымуць удзел у канферэнцыі, прысвечанай расійскай ваеннай прапагандзе, якая адбудзецца ў акупаваным Расіяй Луганску. Вядома, што прафесар кафедры журналістыкі факультэта гісторыі, камунікацыі і турызму Гродзенскага дзяржаўнага ўніверсітэта Марыя Канюшкевіч ажыццяўляла на замову КДБ лінгвістычную экспертызу пратэстнай улёткі, у якой, на яе думку, утрымлівалася абраза Лукашэнкі, што стала доказам віны падсуднага ў рэпрэсіўнай крымінальнай справе. Ірына Зайцава — былая дэпутатка Луганскага абласнога савета, удзельніца прарасійскіх ідэалагічных мерапрыемстваў, унесеная ў базу «Міратворац» за наведванне Крыма ў 2016 г.
– Дырэктар СШ ім. В.А.Хамчаноўскага аграгарадка Клясціцы Расонскага раёна, якая старшынствавала ў выбарчай камісіі ў 2020-м г., назвала ў інтэрв'ю моладзь Украіны, Польшчы і краін Прыбалтыкі «пакаленнем нацыстаў».
– Удзельнікі дзіцяча-юнацкага руху пры Свята-Елісавецінскім манастыры г. Мінска наведалі святкаванне 105-годдзя Узброеных Сіл Рэспублікі Беларусь на «Лініі Сталіна». На мерапрыемстве дзяцей каталі на ваеннай тэхніцы, вучылі страляць з пнеўматычных стрэльбаў, збіраць і разбіраць зброю.
– Прадстаўнік праваабарончай арганізацыі «Human Constanta» пракаментаваў намер уладаў узмацніць кантроль за знаходжаннем дзяцей у інтэрнэце. Паводле яго слоў, гаворка ідзе пра яшчэ большае і даволі грубае блакаванне кантэнту, якое закране як дзяцей, так і дарослых: «На сёння ў Беларусі заблакавана больш за 10 тысяч ідэнтыфікатараў інтэрнэт-рэсурсаў. Мінімум 19 адсоткаў з гэтага — блакіроўкі па палітычных матывах: незалежныя медыя, праваабарончыя арганізацыі і гэтак далей. Цяпер перад дзейнымі ўладамі стаіць пытанне, якіх крокаў не хапае, каб заблакаваць інтэрнэт яшчэ больш».
– З'явілася сведчанне пра тое, што адміністрацыя адной са школ Брэсцкага раёна прымушае аднаго з бацькоў вучня здаваць грошы на БРСМ, нягледзячы на тое, што школьнік не знаходзіцца ў гэтай праўладнай арганізацыі. У выпадку адмовы здаваць грошы, па сведчанні аднаго з бацькоў, адміністрацыя пагражае пастаноўкай бацькоў вучня на ўлік суправаджаецца. Як паведамляе «Белсат», падобная практыка не з'яўляецца адзінкавым выпадкам, а распаўсюджаная ў школах Ленінскага раёна г. Брэста, у прыватнасці ў СШ №7, якой кіруе жонка былога начальніка КДБ па Брэсцкай вобласці Святлана Язерская.
