«Паважанае спадарства,
У гэтай залі роўна год таму праходзіў конкурс песні «Еўрабачанне». Я ўдзячная, што за вашую ўвагу мне не трэба спаборнічаць у песенным конкурсе.
І я шчаслівая быць тут, на Кангрэсе ЕНП, бо ведаю, што я тут сярод сяброў. Сяброў, якія падзяляюць агульныя каштоўнасці і нашую веру ў свабодную дэмакратычную Беларусь.
На працягу многіх гадоў ЕНП была рухальнай сілай, якая падтрымлівала беларускую дэмакратыю ў Еўрапейскім парламенце і за яго межамі.
Дазвольце мне таксама выказаць сваё захапленне і павагу беларускім чальцам сям'і ЕНП – Аб'яднанай грамадзянскай партыі, Беларускай хрысціянскай дэмакратыі і Руху «За Свабоду».
Разам мы правялі магутную кампанію 2020 года, за якой адбылося дэмакратычнае паўстанне і жорсткія пераследы. Многія з нас былі асуджаныя, падвергнутыя катаванням і выгнаныя. Але ніколі, я кажу, ніколі мы не здаваліся.
Дарагія сябры,
Я б хацела паўтарыць адзін відавочны факт, які часам забываецца: Беларусь – гэта Еўропа. Беларусь – гэта не Расія.
Гэта стала відавочна, калі Лукашэнка паспрабаваў уцягнуць нашую краіну ў вайну. Беларусы прыклалі ўсе намаганні, каб дапамагчы Украіне. 1500 чалавек былі затрыманыя за антываенныя пратэсты ў лютым і сакавіку. На тэрыторыі Беларусі партызанамі здзейснена больш за 80 дыверсій, больш за 1,5 тыс. добраахвотнікаў далучыліся да беларускіх батальёнаў украінскай арміі.
Таму так крытычна важна адрозніваць рэжым і народ Беларусі, які нястомна змагаецца з тыраніяй. Дапамажыце народу і пакарайце рэжым.
З аднаго боку, адчыніце дзверы беларускім студэнтам, падтрымайце свабодныя СМІ і прыміце бізнес, які бег з Беларусі. Дапамажыце тым, хто змагаецца на зямлі. Разгледзьце аднабаковы бязвіз для беларусаў. Якое моцнае пасланне гэта было б!
З іншага боку, узмацніце санкцыі, як персанальныя, так і сектаральныя. Санкцыі не павінны быць разменнай манетай. Рэжым спрабуе зняць санкцыі, таму шантажуе свет голадам. Не заключайце ўгодаў з дыктатарамі, іх не ўлагодзіць.
Не гандлюйцеся палітвязнямі, якія па сутнасці з'яўляюцца закладнікамі. Іх больш за 1200. І ўсе яны павінны быць вызвалены без аніякіх умоваў. Некаторым з іх можа пагражаць смяротнае пакаранне згодна з новым законам, падпісаным нелегітымным Лукашэнкам. Ён можа забіваць апанентаў, але не можа прымусіць замаўчаць цэлую нацыю.
У 2020 годзе мы заваявалі права самім вызначаць сваю будучыню як нацыі. Мы паказалі, што Беларусь – гэта не Расія. Мы пачалі свой шлях да свабоды і дэмакратыі. Мы еўрапейская нацыя са сваёй мовай, ідэнтычнасцю і гісторыяй.
Гэты шлях вядзе Беларусь туды, дзе яна гістарычна належыць, – у Еўропу. Гэта таксама ставіць пытанне пра еўрапейскую перспектыву для нашай нацыі. Мы шукаем форму партнёрства, якая ўмацуе нашае становішча ў еўрапейскай сям'і.
Я ўпэўненая, што шлях да міру ў Еўропе ляжыць праз свабоду ў Беларусі. Шлях да міру ў Еўропе ляжыць праз перамогу Украіны. Я ведаю, што гэта цяжкі шлях, але ён адзіна слушны. Давайце пройдзем гэты шлях разам. Таму што толькі калі мы ідзем разам, мы – Еўропа.
Дзякуй!»
Глядзіце відэа выступа Святланы Ціханоўскай па спасылцы.
