Прадстаўнік Ціханоўскай па прававых пытаннях Сяргей Зікрацкі ў эфіры «Краіны для жыцця» распавёў пра працу ў камандзе Святланы Ціханоўскай і СМІ, якія будуць працаваць насуперак ціску і арыштам.
Пра суддзяў, якія выносяць незаконныя прысуды:
– Спачатку мы думалі, што суддзяў чамусьці пераклініла. А калі незаконныя пастановы пачалі прыходзіць масава, стала ясна, што зламаўся не суддзя, а сістэма. І гэта прававы дэфолт.
Гэтых людзей выправіць ужо нельга. Іх памылка не ў галаве, а ў сумленні. У суддзі павінна быць высокая маральная ўстаноўка. Што б ні адбылося, ты вырашаеш лёс чалавека. І павінен дзейнічаць па законе.
Як шмат адвакатаў яшчэ засталося:
– Кіраўніцтва адвакатуры ўжо згніло, яно не абараняе адвакатаў. Але ў самой адвакатуры яшчэ засталося досыць годных адвакатаў. На жаль, іх вычышчаюць. Пачынаючы з кастрычніка ў нас мінус 20-30 адвакатаў. Як толькі будзе падпісаны новы закон «Аб адвакатуры», упэўнены, шмат адвакатаў сыдзе. Баюся, што праз тры месяцы я не змагу знайсці кліенту адваката. І гэта будзе прававы дэфолт у квадраце.
Што змянілася пасля паходаў у СІЗА:
– У мяне вельмі памянялася светаадчуванне пасля таго, як я пачаў хадзіць да кліентаў у СІЗА. Калі ты бачыш, у якіх жахлівых умовах там знаходзяцца невінаватыя людзі, ты выходзіш адтуль і разумееш, што ўсе твае праблемы не маюць значэння. Планка шчасця апускаецца да звычайных бытавых патрэбаў.
У чым заключаецца праца зараз:
– Мяне запрасілі ў Офіс Ціханоўскай у якасці прадстаўніка па прававых пытаннях. Займаюся ўсім тым, што адбываецца ў Беларусі. Гэта пытанні правоў чалавека, універсальнай юрысдыкцыі, аналіз законапраектаў, іншыя юрыдычныя пытанні. Працаваць над гэтым у Беларусі мне было б складана.
Пра атаку на TUT.by:
– Гэта не канец для TUT.BY. Ён не памёр. Гэта ў першую чаргу каманда, а не даменнае імя. Я маю зносіны з журналістамі і бачу стрыжань унутры журналістаў. Зламаць гэты стрыжань немагчыма. Кінулі за краты Кацярыну Барысевіч, Дар'ю Чульцову, Кацярыну Андрэеву – але каманда працягвае працаваць. Затрымалі яшчэ 12 журналістаў – і астатнія працягваюць працаваць. TUT.BY застанецца і будзе жыць.
Чаму мы пераможам:
– У мяне няма сумневаў, што мы пераможам. Чаму? Калі 80% супраць існуючага рэжыма, прымусіць гэтыя 80% быць «за» проста нельга. Зараз пратэст задушаны, людзі баяцца выходзіць на вуліцу. Але ёсць іншыя формы пратэсту. Немагчыма закручваць гайкі да бясконцасці. У адзін момант разьба сарвецца – і ўсё вырвецца вонкі. Змены адбудуцца, пытанне – калі. І кожны на сваім месцы павінен рабіць нешта для таго, каб гэтыя змены адбыліся.
