Сёння, 20 сакавіка, ЦВК Беларусі назваў дату інаўгурацыі Аляксандра Лукашэнкі – 25 сакавіка. У дзень, які ўжо 107 год з’яўляецца сімвалам свабоднай і незалежнай Беларусі. У дзень, калі Беларуская Народная Рэспубліка была абвешчаная незалежнай дзяржавай.
Святлана Ціханоўская – пра прызначэнне «інаўгурацыі» ў Беларусі на 25 сакавіка:
«Лукашэнка прызначыў «інаўгурацыю», ці, лепш сказаць, «каранацыю» на 25 сакавіка – на Дзень Волі. Гэта не супадзенне. Гэта чарговы доказ таго, што ён зневажае нашую гісторыю. Менавіта таму робіць чарговы «палітычны карпаратыў для набліжаных» акурат у такі дзень – каб падмяніць важнае і блізкае беларусам свята і абясцэніць яго сваім фальшывым фарсам. Ён змагаецца з сімваламі, бо разумее: гэта яго слабое месца.
Але сапраўдная інаўгурацыя адбудзецца тады, калі беларусы самі, на свабодных выбарах, вырашаць, хто будзе прадстаўляць краіну. І наш выбар не залежыць ад таго, які фарс ладзіць рэжым. Наш выбар не падпарадкоўваецца іх сцэнарыям і не губляе сілу ад чужых спробаў усё падмяніць. Бо воля людзей – гэта не тое, што можна прызначыць альбо скасаваць указам».
