Святлана Ціханоўская правяла сустрэчу з Рышардам Петру і Эмануэлісам Зінгерысам – генеральным і сітуацыйным дакладчыкамі ПАРЕ па Беларусі. Абмеркаваныя планы і прыярытэты супрацоўніцтва на 2025 год.
Асноўныя тэмы сустрэчы:
- Падрыхтоўка і прыняцце новай рэзалюцыі па Беларусі на зімовай сесіі ПАРЕ ў 2025 годзе. Асноўныя акцэнты: «бязвыбары» і вызваленне палітвязняў.
- Арганізацыя спецыяльнай канферэнцыі па Беларусі ў партнёрстве з ПАРЕ, польскім парламентам і Офісам Святланы Ціханоўскай. Тэмы канферэнцыі – пазітыўная альтэрнатыва для Новай Беларусі і падрыхтоўка да ўступлення ў Раду Еўропы.
- Правядзенне выставы ў Страсбургу, прысвечанай беларускім добраахвотнікам, якія загінулі ва Украіне.
- Падрыхтоўка прававой экспертызы праекта Канстытуцыі Новай Беларусі і запыт заключэння Венецыянскай камісіі.
Па выніках апошніх перамоў, у гэтым месяцы дэлегацыя Каардынацыйнай рады ўпершыню возьме ўдзел у сесіі ПАРЕ. Акрамя таго, у будынку ПАРЕ афіцыйна адкрыўся офіс дэмакратычных сілаў Беларусі.
У мінулым годзе ПАРЕ таксама прыняла адмысловы даклад пра сітуацыю беларусаў за мяжой з рэкамендацыямі для парламентаў і ўрадаў аб падтрымцы легалізацыі і мабільнасці беларусаў. Падрабязнасці дакладу: Люксембургскія рашэнні.
