У Капенгагене Святлана Ціханоўская абмеркавала з міністаркай адукацыі і навуцы Даніі Крысцінай Эгелунд перспектывы супрацоўніцтва ў сферы адукацыі і навуковых даследаванняў. Да размовы далучыліся прадстаўнік Аб’яднанага Пераходнага Кабінета па нацыянальным адраджэнні Павел Баркоўскі і прадстаўніца беларускай дыяспары ў Даніі Лізавета Дубінка-Гушча.
Ціханоўская падзякавала Даніі за падтрымку Еўрапейскага гуманітарнага ўніверсітэта і студэнцкіх абменаў, адзначыўшы, што трэба рыхтаваць новае пакаленне спецыялістаў, якія павядуць краіну да пераменаў.
Падчас сустрэчы абмяркоўваліся розныя напрамкі супрацоўніцтва:
- уключэнне Беларусі ў адукацыйныя праграмы Еўрасаюза, Паўночных краінаў і дацкіх універсітэтаў;
- магчымасці для гуманітарных і рэгіянальных даследаванняў для беларускіх навукоўцаў, у тым ліку па Паўночна-Балтыйскім рэгіёне;
- падрыхтоўка настаўніцкіх кадраў пры дапамозе Даніі;
- перспектывы перакладу вучэбнай літаратуры на беларускую мову і стварэння магчымасцяў для публікацыяў беларускіх навукоўцаў, якія пацярпелі ад рэпрэсіяў;
- супрацоўніцтва з беларускім грамадствам і моладдзю, а не з дзяржаўнымі структурамі рэжыму.
У сваю чаргу, Павел Баркоўскі прадставіў шэраг практычных ідэяў у галіне адукацыі і культуры. Лізавета Дубінка-Гушча падзялілася праблемамі, з якімі сутыкаюцца беларускія даследчыкі ў Даніі, у тым ліку ў сувязі з вайной ва Украіне.
У знак удзячнасці Святлана Ціханоўская перадала міністарцы кнігу «Ord fra Belarus (Words from Belarus)» — зборнік сучасных беларускіх эсэ і паэзіі на дацкай мове, выдадзены ў 2023 годзе арганізацыяй Beladania. Гэта першы пераклад беларускай літаратуры на дацкую мову, які адлюстроўвае барацьбу беларусаў за свабоду і нацыянальную ідэнтычнасць.
