Беларускія палітычныя эмігранты пачалі атрымліваць лісты па месцы рэгістрацыі ў Беларусі, у якіх паведамляецца пра прызнанне іх пашпартоў несапраўднымі і патрабуецца з’явіцца ў аддзел па грамадзянстве і міграцыі для замены дакумента. У выпадку невыканання — папярэджваюць пра накладанне штрафу да чатырох базавых велічынь.
Нагадаем, у 2023 годзе рэжым перастаў замяняць пратэрмінаваныя пашпарты за мяжой.
Гэта сведчыць, што рэпрэсіі пашыраюцца:
➖улады ўсё больш пачынаюць ціснуць на тых, хто ўжо знайшоў прытулак за мяжой;
➖адміністрацыйныя працэдуры і фармальныя патрабаванні ператвараюцца ў інструмент палітычнага шантажу і запалохвання;
➖людзей ставяць перад выбарам: бяспека ці прававы статус, бо такія дзеянні ствараюць штучныя перашкоды для беларусаў, якія былі вымушаныя пакінуць краіну з-за рэпрэсіяў і не могуць вярнуцца без рызыкі пераследу.
Леанід Марозаў, дарадца Святланы Ціханоўская па прававых пытаннях:
«Сёння рэжым выкарыстоўвае нават пратэрмінаваныя пашпарты як зброю супраць сваіх грамадзянаў. Гэта чарговы доказ таго, што пераслед не спыняецца ні за межамі Беларусі, ні з цягам часу. Мы бачым, як сістэма паступова пашырае поле рэпрэсіяў, каб трымаць беларусаў у пастаянным страху і залежнасці».
Што рабіць, калі прыйшоў такі ліст?
Перш за ўсё, узважце рызыкі вяртання ў Беларусь для замены пашпарта. Штраф у 4 базавыя велічыні — гэта малая цана ў параўнанні з магчымасцю трапіць у СІЗА і атрымаць палітычна матываваны прысуд.
