Святлана Ціханоўская выступіла на адкрыцці стартап-хаба Imaguru ў Вільні

Учора, 13 кастрычніка, Святлана Ціханоўская ў Вільні ўдзельнічала ў адкрыцці стартап-хаба Imaguru, які ў Мінску знішчыў рэжым. Разам з сузаснавальніцай Таццянай Марыніч і міністаркай эканомікі і інавацый Літвы Аўшрынэ Арманайтэ яна выступіла з вітальным словам. Таксама на адкрыцці прысутнічалі амбасадар Іспаніі ў Літве Хасэ Марыя Раблес Фрага, амбасадар Германіі Маціяс Сон, амбасадар Швецыі Інгер Бакстан, амбасадар Нарвегіі Оле Тэр'е Харпестад, амбасадар ЗША Роберт С. Гілкрыст.

Ціханоўская: «З самага пачатку хачу сказаць, што за адзін апошні год пра айці мне давялося даведацца больш, чым за ўсё жыццё. Пачалося ўсё, вядома, з «Голаса» – калі мы з Машай і Веранікай распавядалі ўсёй краіне, як карыстацца сістэмай падліку галасоў на выбарах, хоць самі з цяжкасцю разумелі, як гэта будзе працаваць. Але мы паверылі адно аднаму, і гэта спрацавала – і ў нас упершыню з'явіўся цяперашні доказ фальсіфікацый.

Ужо пасля гэтага дзякуючы вам, айцішнікам, з'явілася мноства сайтаў, сервісаў падтрымкі і платформаў дапамогі. І я пазнаёмілася з вялікай колькасцю таленавітых людзей, якія думаюць, дзейнічаюць і нават гавораць зусім інакш. Цяпер я ведаю ўстоянае меркаванне, што айці-сфера ў Беларусі стала гісторыяй поспеху, таму што дзяржава ў яе не ўмешвалася. Цяпер ведаю, як шмат прадпрымальнікаў працавалі і працягваюць працаваць у Беларусі насуперак страху, што іх пасадзяць дзеля збору грошай. Цяпер бачу, як шмат таленавітых людзей дзесяцігоддзямі з'язджалі з Беларусі, таму што былі абмежаваныя ў прафесійным развіцці. Я бачыла іх, гаварыла з імі – яны зараз паспяховыя інвестары і кіраўнікі вялікіх кампаній у Амстэрдаме, Лондане або Сан-Францыска. Мне вельмі шкада, што дзеля гэтага ім давялося пакінуць радзіму. Але мне радасна, што большасць з іх чакаюць вяртання дадому – і ўвесь гэты час моцна дапамагаюць сваёй краіне.

Я вельмі ўдзячная ўсім вам за гэта. Усё, што вы робіце, стварае велізарны кантраст паміж нашай жаданай новай Беларуссю і краінай, якую рэжым спрабуе замарозіць і пагрузіць у змрок.

  • Калі яны закрываюць СМІ, каб сцерці праўду і доказы, вы ствараеце сістэмы збору доказаў злачынстваў.
  • Калі яны адпраўляюць нявінных людзей за краты, вы дапамагаеце іх сем'ям фінансава.
  • Калі яны грамяць НДА і праваабарончыя цэнтры – вы дапамагаеце рабіць платформы, каб людзі маглі працаваць і дапамагаць адно аднаму аддалена.
  • Калі яны звальняюць лекараў і працоўных – вы падтрымліваеце стачкі і распрацоўваеце сервісы тэлемедыцыны.
  • Калі яны выштурхоўваюць больш за палову стартапаў з краіны, вы адкрываеце хабы, як Імагуру, якія дапамагаюць гэтым камандам працягнуць працу.

Грубай сіле вы супрацьпастаўляеце сілу інтэлекту, а безнадзейнаму мінуламу – будучыню. Яркі таму прыклад – тое, што PandaDoc, якой рэжым зладзіў паказальныя рэпрэсіі, стала першым беларускім «аднарогам». Я не ведаю, чаму стартапы, якія ацэньваюць у мільярд долараў, пачалі называць аднарогамі, але гэта сапраўды цуд – бо гэтага выніку каманда дамаглася насуперак жудаснаму ціску і арыштам супрацоўнікаў. І можна толькі ўявіць, на што здольныя беларускія айцішнікі – калі стварыць спрыяльны клімат для іх развіцця.

Таму нашая мэта – каб Беларусь была адкрытая, камфортная і бяспечная для інавацый і бізнесаў.

– Каб талентам не трэба было з'язджаць дзеля добрай адукацыі і кар'еры.
– Каб дзяржава прасіла дапамогі ў айці-кампаній у падрыхтоўцы новых спецыялістаў.
– Каб усе беларусы разумелі, што айці-сектар не проста прыносіць краіне падаткі – ён стварае новыя магчымасці і працоўныя месцы, дапамагае развіваць мноства сфер ад сельскай гаспадаркі да вытворчасці мэблі або нашай любімай згушчонкі.

Каб усё гэта стала рэальнасцю, у нас ёсць тры глабальныя задачы:

– Першая – падтрымаць тых спецыялістаў, якія застаюцца ў краіне і шукаюць працу.
– Другая – дапамагчы кампаніям, якія пацярпелі і рэлакаваліся, выжыць і развівацца.
– Трэцяя – стварыць умовы для вяртання ў Беларусь, як толькі гэта стане магчыма.

Я думаю, усе, хто сабраўся тут, ужо вельмі шмат зрабілі для гэтага – і зробяць яшчэ больш. Дзякую вам за вашую працу, дзякую і віншую каманду Imaguru з адкрыццём хаба. Мне ўсё яшчэ бывае складана разумець, калі пры сустрэчы вы кажаце, што трэба, напрыклад «зарэкагнайсіць кантрыб'юшан» – але я і мая каманда адкрытая і гатовая дапамагаць усім, што ў нашых сілах. Дзякуй вам.

Асобна я хачу падзякаваць міністарцы Арманайтэ за тое, што сёння яна з намі, за яе падтрымку і падтрымку ўрада Літвы гэтага хаба і ўсіх беларусаў у складаны для нас час.

Ačiū labai!»