Кантактная група, створаная Радай Еўропы сумесна з беларускімі дэмакратычнымі сіламі і грамадзянскай супольнасцю, правядзе сваё першае пасяджэнне 7 лістапада ў 15:00 у Страсбургу ў Палацы Еўропы. Працу Кантактнай групы распачнуць Генеральная сакратарка Рады Еўропы Марыя Пейчыновіч-Бурыч і Лідарка дэмакратычнай Беларусі Святлана Ціханоўская.
Чальцы Кантактнай групы прадстаўляюць дэмакратычныя сілы, супольнасці і грамадзянскую супольнасць Беларусі, а таксама адпаведныя органы Рады Еўропы. Кантактная група засяродзіцца на распрацоўцы, арганізацыі і кантролі праграмаў і праектаў на карысць народа Беларусі.
«Стварэнне Кантактнай групы Рады Еўропы па Беларусі – гэта беспрэцэдэнтная падзея, якая дасць магчымасць народу Беларусі скарыстацца вялікім вопытам і параўнальнымі ведамі арганізацыі ў галіне пабудовы дэмакратычных інстытутаў і развіцця грамадзянскай супольнасці», – сказала Святлана Ціханоўская. «Нашая стратэгічная мэта – уступленне Беларусі ў Раду Еўропы ў якасці паўнапраўнага чальца, і гэта першы крок у гэтым напрамку».
Кантактная група была створаная Генеральнай сакратаркай Рады Еўропы на падставе рашэння, прынятага Камітэтам міністраў 7 верасня. Раней у 2022 годзе Камітэт міністраў прыняў рашэнне прыпыніць усе адносіны з рэжымам Лукашэнкі.
