Перад самой сустрэчай з прэзідэнтам ЗША Байдэнам, які прыбывае ў Варшаву пасля саміту НАТА ў Брусэлі, прэзідэнт Польшчы Анджэй Дуда правёў сустрэчу са Святланай Ціханоўскай і яе дэлегацыяй у складзе кіраўніка НАК Паўла Латушкі і прадстаўніцы КР па палітвязнях і каманды Бабарыкі Таццяны Хоміч.
Абмеркавалі, якую сумесную палітыку ЕС, ЗША і беларусы бачаць у дачыненні да Лукашэнкі, неабходнасць вываду расійскіх войскаў з тэрыторыі Беларусі. Прэзідэнт Дуда расказаў пра вынікі саміту НАТА. Ён запэўніў, што ў Альянсе ёсць дакладнае разуменне, што беларусы супраць вайны ва Украіне. Ціханоўская заявіла, што беларусы ўзмацняюць Антываенны Рух, а ў беларускім войску растуць пратэстныя настроі. Таму неабходны бяспечны калідор для тых вайскоўцаў, якія не хочуць дзяліць адказнасць за злачынствы рэжыму. Таксама яна заклікала прэзідэнта падтрымаць беларусаў, якія вымушана з'ехалі ў Польшчу.
