Пра ролю Расіі ў беларускім крызісе
– Расія вырашыла падтрымаць Лукашэнку, але, магчыма, цяпер кіраўніцтва РФ трохі шкадуе пра гэты выбар, таму што рэйтынгі адабрэння яго дзеянняў упалі больш чым на 50 адсоткаў. Беларусы асацыююць гвалт і рэпрэсіі супраць іх у вялікай ступені з Расіяй.
Зараз мы асцерагаемся, што Расія можа скарыстацца слабасцю Лукашэнкі, каб узмацніць свой кантроль над Беларуссю і прымусіць яго падпісаць пагадненні аб інтэграцыі, якія будуць супярэчыць інтарэсам беларусаў. Ён не мае права падпісваць паперы ад імя беларускага народа, тым больш тыя, якія ставяць пад пытанне незалежнасць і суверэнітэт краіны.
Мы заклікаем ЗША і ЕС паслаць ясны сігнал у Расію, што ўсе такія пагадненні, усе ўгоды аб куплі прадпрыемстваў, якія знаходзяцца ў дзяржуласнасці (гэта значыць належаць беларускаму народу) могуць быць перагледжаныя і ануляваныя. І гэта паведамленне не толькі для Расіі, але і для любой іншай дзяржавы, якая захоча скарыстацца слабасцю Лукашэнкі.
Пра будучыню сілавых структур
– У нас ёсць фокус групы ўнутры Беларусі, мы вывучаем настрой і страхі сілавікоў на розных узроўнях у розных падраздзяленнях. Тое, што мы даведаліся, нас здзівіла. Апынулася, што сілавікі – адна з найменш абароненых у Беларусі групаў. У іх няма ніякіх механізмаў абароны сваіх правоў, ім нельга ўтвараць прафсаюзы. У той жа час Лукашэнка выкарыстоўвае іх для абароны сваіх палітычных інтарэсаў. Гэтая негатыўная рэпутацыя распаўсюджваецца на кожнага, хто носіць форму ў Беларусі, – і яны адчуваюць гэта. У той жа час сілавікі баяцца, што будуць звольненыя без разбору. Але наш пасыл у тым, што яны могуць застацца на сваіх месцах, калі не здзяйснялі злачынстваў. Мы кажам: у вас будзе выбар, застацца ў прафесіі або сысці, у вас застануцца вашыя сацыяльныя гарантыі, вашае жыллё.
Злачынствы здзяйсняла адносна невялікая група сілавікоў, некаторыя з іх – цяжкія і асабліва цяжкія. Вось гэтыя людзі, вядома, панясуць адказнасць па законе, але іх будуць судзіць у сумленных і справядлівых судах.
